GEDAGTES VAN ‘N KERS – My voorkoms en vorm het ek nie self gekies nie.  Ten spyte van my begeerte om anders te lyk, is ek vandag dankbaar en bly dat ek wonderlik gevorm is.

Die vuur wat ek aanvanklik gevrees het en wat so deel van my is, het my aangewakker om my skeppingsdoel te bereik, naamlik om lig uit te straal.Ek is gemaak om te skyn, om warmte in mense se lewens te bring en om vreugde te saai.  Graag sou ek my strale uitstuur na die donkerste hoeke waar duisternis en moedeloosheid heers.  Ek wil nie beroemd, raakgesien of bedank word nie.  Ek wil diensbaar wees.

Moeilike tye ken ek ook.  My vyande, wind en storm probeer gereeld om my uit te doof.  In hierdie onrustige oomblikke omvou beskermende hande my wat keer dat my lig verswak.

My grootste dank gaan uit na díé een wat my gevorm en aangesteek het.  My lewe sal liefde en dank tot Sy eer uitstraal!